Suba sang Iloilo

a binalaybay by Roger B Rueda

Sang una, ang suba sang Iloilo damu
nagalangoylangoy nga maduagon
nga putos sang kalanönon.
Ang mga bata tapos kaon sang ila
balon, dayon dalagan sa taytay
kag didto ila ihulabog
ang nanarisari nga plastik
nga nanarisari man ang duag
kag kadakuon.
Katahum sa ila tulukon.
Daw nagahampanghampang
lang sila sa babaw sang taytay
samtang ang ila mga nanay
nagayuhumyuhum.
‘Toto kag Inday,
tapos kaon, ipalak ninyo
inang putos didto,’
dayon tudlo sang taytay.
Ang iban didto man gapamusön.
Ang mga pamalay
sa suba ang ila ugsaran.
Ang iban nga mga bata
kasadya nga nagalangoylangoy
sa malaata nga tubigsuba.
Subong  ang suba maduagon
man gihapon.
Damu bangibangi
sa panghigadon.
Wala na ang mga plastik
nga nagautawütaw sa tubig
kundi mga panganod na
kag mga pispis nga
nagalupadlupad sa idalum sang tubigsuba.