Ang tinaga nga nagakawas sa baba
sang yawa maamion, daw
kan-on nga bag-o hakid
sa banyado –
ang iya amorokpok
daw balunasan
nga wala kaagi mala,
mangito-ngito
kag marigna.
Ang nagalabay
daw madigwa,
daw mapilo ang kasudlan.
Ang iya kalantahon
kag ang iya pangamuyo
linangitnon
kag mala-anghel.
Nagahibi-hibi man sia
sa kruz, sa bibliya.
Sa adlaw sang Domingo
naga-uwang-uwang man sia
amba sang kalantahon
sang iya pagtuo
apang sa iya dughan
ang iya kinaiya –
kadulom, yinawan-on nga pagkaduna.
No comments:
Post a Comment